யாஸ் புயல் முன்னெச்சரிக்கை… அமைச்சர்களுடன் பிரதமர் மோடி ஆலோசனை.

யாஸ் புயல் முன்னெச்சரிக்கை நடவடிக்கைகள் குறித்து பிரதமர் நரேந்திர மோடி, தேசிய பேரிடர் மேலாண்மை ஆணையத்தின் பிரதிநிதிகள் மற்றும் அமைச்சர்களுடன் இன்று ஆலோசனை நடத்தினார்.

கிழக்கு-மத்திய வங்கக் கடலில் உருவாகியுள்ள காற்றழுத்த தாழ்வு பகுதி தற்போது தாழ்வு மண்டலமாக மாறி வருகிறது. வங்கக்கடலில் நிலவும் வெப்பநிலை காரணமாக காற்றழுத்த தாழ்வு நிலை வேகமாக வலுப்பெற்று வருகிறது. வங்கக்கடலில் உருவாகியுள்ள இந்த தாழ்வு நிலை இன்று இரவு அல்லது நாளை அதிகாலை புயலாக மாறும் என்று வானிலை ஆய்வு மையம் எச்சரிக்கை விடுத்துள்ளது மேலும், யாஸ் புயல், நாளை இரவே அதி தீவிர புயலாக உருவெடுக்கும் என்று கணிக்கப்பட்டுள்ளது.

மேலும், 26ஆம் தேதி ஒடிசா மற்றும் மேற்கு வங்காளத்திற்கு இடையில் யாஸ் புயல் கரையை கடக்கும் அல்லது லேசாக திசை மாறி வங்கதேசம் அருகே கரையை கடக்கும் என வானிலை ஆய்வு மையம் தெரிவித்துள்ளது. யாஸ் புயலை எதிர்கொள்வதற்கான முன்னெச்சரிக்கை நடவடிக்கைகள் குறித்து தேசிய பேரிடர் மேலாண்மை ஆணையத்தின் பிரதிநிதிகள், மூத்த அரசு அதிகாரிகள், தொலைத் தொடர்பு, மின்சாரம், விமானப் போக்குவரத்து, புவியியல் அமைச்சகங்களின் செயலாளர்கள் ஆகியோருடன் பிரதமர் நரேந்திர மோடி இன்று ஆலோசனை நடத்தினார்.